కావాల్సిన పదార్థాలు: చికెన్: 1/2 కిలో, పచ్చిశనగపప్పు: 1/2 కప్పు, ఉల్లిపాయలు: 2 పెద్దవి (తరిగినవి), పచ్చిమిరపకాయలు: 4, నూనె: తగినంత, ఉప్పు: రుచికి సరిపడా, కారం: 3 స్పూన్లు (లేదా మీ రుచికి తగ్గట్టు), పసుపు: 1/2 స్పూన్, కొత్తిమీర: కొద్దిగా (గార్నిష్ కోసం)
ధనియాలు: 2 స్పూన్లు, జీలకర్ర: 1 స్పూన్, అల్లం: చిన్న ముక్క, వెల్లుల్లి రెక్కలు: 7-8, కొబ్బరి ముక్క: చిన్నది (ఎండు లేదా పచ్చి)
జీడిపప్పులు: 4-5, దాచిన చెక్క: చిన్న ముక్క, లవంగాలు: 4-5, యాలక్కాయలు: 2 తీసుకోవాలి.
ముందుగా, ఒక బౌల్ తీసుకుని అందులో అర కప్పు పచ్చిశనగపప్పు వేసి రెండు సార్లు శుభ్రంగా కడగాలి. తరువాత, కొద్దిగా నీరు పోసి పప్పును నానబెట్టి పక్కన పెట్టుకోవాలి. పప్పు కనీసం 30 నిమిషాల నుండి 1 గంట వరకు నానితే బాగా ఉడుకుతుంది.అర కిలో చికెన్‌ను తీసుకుని బాగా శుభ్రం చేయాలి. అందులో అర స్పూన్ ఉప్పు, అర స్పూన్ కారం, అర స్పూన్ పసుపు వేసి, మొత్తం చికెన్‌కు బాగా పట్టేలా కలపాలి. దీనిని కూడా పక్కన పెట్టుకోవాలి.
ఒక మిక్సీ జార్ తీసుకుని, అందులోకి ధనియాలు, జీలకర్ర, అల్లం ముక్క, వెల్లుల్లి రెక్కలు, కొబ్బరి ముక్క, జీడిపప్పులు, దాసిన చెక్క ముక్క, లవంగాలు, యాలక్కాయలు వేయాలి. వీటన్నింటినీ నీరు కలపకుండా, లేదా చాలా తక్కువ నీటితో మెత్తని పేస్ట్‌గా చేసుకోవాలి.
స్టవ్ వెలిగించి ఒక పాన్ పెట్టి, అందులో కర్రీకి సరిపడా నూనె వేయాలి. నూనె వేడైన తర్వాత, సన్నగా తరిగిన రెండు పెద్ద సైజు ఉల్లిపాయలు, తరిగిన నాలుగు పచ్చిమిరపకాయలు వేసి బాగా వేయించుకోవాలి. ఉల్లిపాయలు బంగారు రంగు వచ్చేవరకు నిరంతరం కదుపుతూ ఫ్రై చేయాలి.
ఉల్లిపాయలు వేగిన తర్వాత, మార్నేట్ చేసుకున్న చికెన్‌ను వేసి మొత్తం కలిసేలా కలపాలి. చికెన్‌ను కొద్దిసేపు నూనెలో ఫ్రై చేయాలి. తరువాత, నానబెట్టి ఉంచుకున్న పచ్చిశనగపప్పును కూడా వేసి మొత్తం కలిసే వరకు బాగా కలుపుకోవాలి. ఇలా ఒక నిమిషం పాటు వేయించాలి.ఇప్పుడు మనం పేస్ట్ చేసి పెట్టుకున్న మసాలాను పాన్‌లో వేసి, మొత్తం కూర అంతా బాగా కలిసేలా కలుపుకోవాలి. మసాలా కూడా ఆయిల్ లో రెండు నిమిషాలు కదుపుతూ ఫ్రై చేయాలి. ఇందులోనే రుచికి సరిపడా ఉప్పు కూడా వేసుకుని ఒకసారి బాగా కలిపి, మూత పెట్టుకుని ఐదు నిమిషాలు మీడియం ఫ్లేమ్‌లో ఉడికించుకోవాలి.
ఐదు నిమిషాల తర్వాత మూత తీసి ఒకసారి కదుపుకోవాలి. తరువాత, మూడు స్పూన్లు కారం వేసుకోవాలి కారం పచ్చి వాసన పోయే వరకు ఆయిల్ లో కొద్దిసేపు ఫ్రై చేయాలి. ఇలా ఫ్రై అయిన తర్వాత, ఒక గ్లాసు నీరు పోసి మొత్తం కలిసే వరకు కలుపుకోవాలి. ఇప్పుడు మూత పెట్టి, స్టవ్ ను హై ఫ్లేమ్‌లోకి మార్చి ఐదు నిమిషాలు ఉడికించాలి. తరువాత మూత తీసి ఒకసారి కదిపి, స్టవ్ ను మీడియం ఫ్లేమ్‌లోకి మార్చి మళ్లీ మూత పెట్టి రెండు మూడు నిమిషాలు ఉడికించాలి. చివరగా, స్టవ్ ను సిమ్‌లో పెట్టి గ్రేవీ చిక్కబడే వరకు కదుపుతూ ఉడికించుకోవాలి. గ్రేవీ చిక్కబడిన తర్వాత, కొద్దిగా కొత్తిమీర వేసుకుని ఒక నిమిషం ఉడికించి, స్టవ్ ఆఫ్ చేయాలి. ఎంతో రుచికరమైన శెనగపప్పు చికెన్ కర్రీ రెడీ. ఈ కూర అన్నంలోకే కాకుండా, రోటీ, చపాతీ, దోశ, ఇడ్లీ వంటి వాటిలోకి కూడా చాలా రుచిగా ఉంటుంది. మీరు కూడా తప్పకుండా ప్రయత్నించి చూడండి.