సక్సెస్ అంటే రోజుకు 12 నుండి 14 గంటలు కష్టపడటమేనా? అసలు ఆనందాన్ని పణంగా పెట్టి సంపాదించే డబ్బు నిజమైన విజయమేనా? ఈ ప్రశ్నలే ఢిల్లీకి చెందిన మెహర్ వర్మ జీవితాన్ని మలుపు తిప్పాయి. లా ఫర్మ్లో లాయర్గా పనిచేస్తున్నప్పుడు ఆమెకు బయట ప్రపంచానికి అంతా ‘సార్టెడ్’గా కనిపించినా, లోపల మాత్రం ఆమె ఎంతో నలిగిపోయింది. ఏ బ్యాకప్ ప్లాన్ లేకుండానే ఉద్యోగం వదిలేసి, ఇప్పుడు నెలకు రెండు లక్షల ఆదాయంతో హాయిగా జీవిస్తున్న ఆమె ప్రయాణం, కెరీర్ పట్ల అసంతృప్తిగా ఉన్న ప్రతి ఒక్కరికీ ఒక కొత్త ఆలోచనను ఇస్తుంది.
మెహర్ వర్మ ప్రయాణం ఎంతో మంది యువతకు ఒక కనువిప్పు. 24 ఏళ్లకే నెలకు లక్ష రూపాయలు సంపాదిస్తున్న ఆమె, ఒక రోజు తన జీవితాన్ని ఆనందంగా గడపడం లేదని గ్రహించింది. ఆ గ్రహింపే ఆమెను ఒక సాహసోపేతమైన నిర్ణయం తీసుకునేలా చేసింది. ఎటువంటి బ్యాకప్ ప్లాన్ లేకుండానే ఆమె లాయర్ ఉద్యోగానికి రాజీనామా చేసింది.
ఆ నిర్ణయం వెనుక ఆందోళన..
ఉద్యోగం వదిలేశాక ఆ మార్పు సులభంగా జరగలేదు. తల్లిదండ్రుల వ్యతిరేకత, బంధువుల ముందు ఎదురైన ఇబ్బందికర పరిస్థితులు, మొదటి ఫ్రీలాన్సింగ్ ప్రాజెక్టులో కేవలం 10 వేల రూపాయల ఆదాయం.. ఇవన్నీ ఆమెను తీవ్రంగా కలవరపెట్టాయి. ఎన్నో రాత్రులు తాను తప్పు చేశానా అని బాధపడింది. కానీ, ఆత్మవిశ్వాసం కోల్పోకుండా, రోజువారీ కంటెంట్ క్రియేషన్పై దృష్టి పెట్టింది.
క్రమంగా కంటెంట్ క్రియేషన్లో తనదైన శైలిని అలవర్చుకుంది. తన అనుభవాలను, కథలను ప్రజలతో పంచుకుంటూ సోషల్ మీడియా స్ట్రాటజిస్ట్గా, యూజీసీ (UGC) క్రియేటర్గా ఎదిగింది. కేవలం 14 నెలల వ్యవధిలోనే తన ఆదాయాన్ని నెలకు రెండు లక్షలకు పెంచుకుంది. ప్రస్తుతం ఆమె ఫౌండర్లకు పర్సనల్ బ్రాండింగ్ నిర్మించడంలో సహాయపడుతోంది.
ఆనందమే అసలైన సక్సెస్!
మెహర్ వర్మ ఇప్పుడు రోజుకు ఆరు గంటలు మాత్రమే పనిచేస్తోంది. జిమ్, పికెల్బాల్, కేఫ్లకు వెళ్లడం, కుటుంబంతో సమయం గడపడం వంటివి చేస్తూ జీవితాన్ని ఆస్వాదిస్తోంది. “సక్సెస్ అంటే మీ సమయాన్ని, ఆరోగ్యాన్ని బలివ్వడం కాదు” అని ఆమె గట్టిగా చెబుతోంది. “మీ జీవితం మీకు సంతృప్తినివ్వకపోతే, దారి మార్చుకునే హక్కు మీకు ఉంది. ఎవరూ మిమ్మల్ని తక్కువగా చూసేలా అనుమతించకండి” అని ఆమె యువతకు సలహా ఇస్తున్నారు. మెహర్ వర్మ ప్రయాణం మనకు ఒకటే చెబుతోంది. డబ్బు, హోదా కంటే మీ మానసిక ప్రశాంతత, వ్యక్తిగత ఆనందం చాలా ముఖ్యం. ధైర్యంగా అడుగు వేస్తే, కొత్త అవకాశాలు మీ కోసం ఎదురుచూస్తూ ఉంటాయి.