మేషం: ఈ రాశిలో శుక్ర, రవుల సంచారం వల్ల వృత్తి, ఉద్యోగాల్లో ఉన్నవారికి ప్రాభవం, ప్రాధాన్యం పెరుగుతాయి. పదోన్నతులకు అవకాశం ఉంటుంది. ఉన్నత స్థాయి జీవితం ఏర్పడుతుంది. సమాజంలో ఒక ప్రముఖ వ్యక్తిగా చెలామణీ అయ్యే అవకాశముంటుంది. పలుకుబడి కలిగిన వ్యక్తులు, రాజకీయ ప్రముఖులతో పరిచయాలు ఏర్పడతాయి. రాజపూజ్యాలు కలుగుతాయి. ఆర్థికంగా అంద లాలు ఎక్కడం జరుగుతుంది. రాజకీయాల్లో లేక ప్రభుత్వంలో ఉన్నవారికి అధికార యోగం పడుతుంది.
మిథునం: ఈ రాశికి లాభ స్థానంలో రవి, శుక్రుల కలయిక వల్ల అనేక వైపుల నుంచి ఆదాయం ఇబ్బడి ముబ్బడిగా పెరుగుతుంది. ఏ ప్రయత్నం తలపెట్టినా కలిసి వస్తుంది. ముఖ్యమైన అవసరాలు తీరిపోవడమే కాకుండా, బ్యాంక్ బ్యాలెన్స్ బాగా వృద్ధి చెందుతుంది. ప్రముఖులతో పరిచయాలు పెరుగుతాయి. రాజకీయాల్లో ఉన్నవారికి అధికార యోగం పడుతుంది. ఉద్యోగులకు రావలసిన పదోన్నతులు లభిస్తాయి. వృత్తి, వ్యాపారాల్లో లాభాలు వృద్ధి చెందుతాయి. ఆరోగ్యం మెరుగుపడుతుంది.
కర్కాటకం: ఈ రాశివారికి దశమ స్థానంలో ఉచ్ఛ రవి ఉండడం, పైగా శుక్రుడితో కలవడం వల్ల వృత్తి, ఉద్యోగాల్లో రాజయోగం కలుగుతుంది. తప్పకుండా అధికారం చేపట్టే అవకాశం ఉంటుంది. ఆదాయ పరంగా కూడా అంచనాలకు మించిన అభివృద్ధి ఉంటుంది. వ్యాపారాలు నష్టాల నుంచి బయట పడి లాభాల బాట పడతాయి. నిరుద్యోగులకు కోరుకున్న సంస్థలో ఆశించిన ఉద్యోగానికి ఆఫర్ వస్తుంది. ఉద్యోగం మారడానికి చేసే ప్రయత్నాలు ఫలిస్తాయి. సామాజికంగా గుర్తింపు లభిస్తుంది.
సింహం: ఈ రాశికి అధిపతి అయిన రవి ఉచ్ఛలో ఉండడమే కాకుండా, దానితో శుక్రుడు కలవడం వల్ల ఈ రాశివారు తప్పకుండా సాధారణ స్థాయి నుంచి ఉన్నత స్థాయికి వెళ్లడం జరుగుతుంది. విదేశీ ఉద్యోగాలకు అవకాశం ఉంది. ఉద్యోగులకు డిమాండ్ బాగా పెరుగుతుంది. అనేక విధాలుగా సిరిసంపదలు కలిసి వస్తాయి. వృత్తి, వ్యాపారాల్లో డిమాండ్ తో పాటు, రాబడి కూడా అంచనాలకు మించి పెరుగుతుంది. జీవితంలో కొన్ని ముఖ్యమైన శుభ పరిణామాలు చోటు చేసుకుంటాయి.
తుల: ఈ రాశికి సప్తమ స్థానంలో రాశ్యధిపతి శుక్రుడితో ఉచ్ఛ రవి కలవడం వల్ల రాజయోగాలు, రాజ పూజ్యాలు కలుగుతాయి. ప్రభుత్వం నుంచి గుర్తింపు లభిస్తుంది. ప్రాధాన్యం, ప్రాభవం పెరుగుతాయి. ఏ రంగంలో ఉన్నా ఉన్నత స్థానాలకు వెళ్లడం జరుగుతుంది. మంచి పరిచయాలు ఏర్పడతాయి. జీవన శైలిలో సానుకూల మార్పులు చోటు చేసుకుంటాయి. వ్యక్తిగత, ఆర్థిక సమస్యల నుంచి విముక్తి లభిస్తుంది. సంపన్న కుటుంబంలో మంచి పెళ్లి సంబంధం కుదురుతుంది.
మకరం: ఈ రాశికి పంచమ స్థానంలో శుక్ర, రవుల కలయిక జరుగుతున్నందువల్ల, ఊహించని అదృష్టాలు పడతాయి. షేర్లు, స్పెక్యులేషన్ల వంటివి విపరీతంగా లాభిస్తాయి. సామాజికంగా మంచి గుర్తింపు లభిస్తుంది. ప్రతిభా పాటవాలు వెలుగులోకి వస్తాయి. మీ సలహాలు, సూచనలకు సర్వత్రా విలువ ఉంటుంది. వృత్తి, ఉద్యోగాల్లో అంచనాలకు మించి వృద్ధిలోకి వస్తారు. వ్యాపారాలు కొత్త పుంతలు తొక్కుతాయి. ఆకస్మిక ధన ప్రాప్తికి అవకాశముంది. సంతాన ప్రాప్తి సూచనలు కూడా ఉన్నాయి.