హైదరాబాద్, అక్టోబర్ 6: భారత్‌లో ChatGPT వినియోగదారులకు OpenAI పరిమిత కాలం పాటు ప్రత్యేక ఆఫర్‌ను అందిస్తోంది. ఎంపిక చేసిన అర్హత కలిగిన వినియోగదారులకు ChatGPT Plus సబ్‌స్క్రిప్షన్‌ను నెల రోజుల పాటు ఉచితంగా వినియోగించే అవకాశం కల్పిస్తోంది. సాధారణంగా నెలకు రూ.1999 చెల్లించాల్సి ఉండగా.. ఈ ప్రమోషన్‌లో భాగంగా అర్హత ఉన్న ఖాతాల్లో ధరను రూ.0గా చూపిస్తోంది. అయితే ఈ ఆఫర్ ప్రతి ChatGPT ఖాతాకు అందుబాటులో ఉన్నట్లు కనిపించడం లేదు. ఖాతా ఆధారంగా ప్రమోషన్ లభ్యత మారుతోంది.
ఎలా క్లెయిమ్ చేసుకోవాలంటే..?
ఉచిత ChatGPT Plus ఆఫర్‌ను నేరుగా ChatGPT సబ్‌స్క్రిప్షన్ పేజీ నుంచే క్లెయిమ్ చేసుకోవచ్చు. ఇందుకోసం ముందుగా ఆఫర్ అందుబాటులో ఉన్న ChatGPT ఖాతాలో సైన్‌ ఇన్‌ కావాలి. అనంతరం Subscription లేదా Upgrade పేజీకి వెళ్లి ChatGPT Plus ప్లాన్‌ను పరిశీలించాలి. ఖాతా ఈ ఆఫర్‌కు అర్హత కలిగి ఉంటే Plus ప్లాన్ కింద Claim free offer అనే ఆప్షన్ కనిపిస్తుంది. సాధారణంగా రూ.1999గా ఉన్న నెలవారీ ధర కొట్టివేయబడి.. ప్రమోషన్ కాలానికి రూ.0గా చూపిస్తుంది. ఆ ఆప్షన్‌పై క్లిక్ చేసి సాధారణ సబ్‌స్క్రిప్షన్ చెక్‌అవుట్ ప్రక్రియను పూర్తి చేయాలి. నెల రోజుల ఉచిత ట్రయల్ అయినప్పటికీ.. సబ్‌స్క్రిప్షన్ తీసుకునే సమయంలో వినియోగదారులు చెల్లింపు సమాచారాన్ని అందించాల్సి ఉంటుంది. కార్డు, నెట్‌ బ్యాంకింగ్ వంటి పేమెంట్‌ విధానాలను ఉపయోగించవచ్చు. UPI ఆప్షన్ కూడా కనిపిస్తున్నప్పటికీ, కొన్ని సందర్భాల్లో ఆ విధానంతో ఉచిత ప్లాన్‌ను యాక్టివేట్ చేయడంలో ఇబ్బందులు తలెత్తుతున్నట్లు యూజర్లు చెబుతున్నారు.
ఇవి కూడా చదవండి
అందరికీ ఎందుకు కనిపించడం లేదు?
ఈ ప్రమోషన్ ఖాతా ఆధారంగా అందుబాటులోకి వస్తున్నట్లు తెలుస్తోంది. గతంలో ChatGPTలో ఎలాంటి చెల్లింపు ప్లాన్‌ను సబ్‌స్క్రైబ్ చేయని ఖాతాలో ఉచిత Plus ఆఫర్ కనిపించగా.. గతంలో ChatGPT Go సబ్‌స్క్రిప్షన్ తీసుకున్న మరో ఖాతాలో ఈ ఆఫర్ కనిపించలేదు. ఆ ఖాతాలో సాధారణ రూ.1,999 నెలవారీ ధరనే చూపించింది. అందువల్ల మీ ఖాతాలో ఈ ఆఫర్ కనిపించకపోతే.. మీరు తప్పనిసరిగా అర్హులు కాదని అర్థం కాదు.. ప్రస్తుతం ప్రమోషన్ ఎంపిక చేసిన ఖాతాలకు మాత్రమే అందుబాటులో ఉండే అవకాశం ఉంది. ఉచిత ట్రయల్ పూర్తయిన తర్వాత సబ్‌స్క్రిప్షన్ కొనసాగితే సాధారణ ఛార్జీలు వర్తించే అవకాశం ఉన్నందున.. ట్రయల్ నిబంధనలు, తదుపరి బిల్లింగ్ వివరాలను చెక్‌ చేసుకోవడం మంచిది.