సూప్‌లు, కర్రీలు, పిజ్జాలు, బిర్యానీలు.. ఇలా నేటి కాలంలో ఏ రెస్టారెంట్‌కు వెళ్లినా పుట్టగొడుగులతో చేసిన వెరైటీలు విరివిగా కనిపిస్తున్నాయి. అయితే, పుట్టగొడుగులు చూడ్డానికి, తినడానికి కొంత మాంసాహార అనుభూతిని ఇవ్వడంతో.. ఇవి నిజంగా శాకాహారమేనా లేక మాంసాహారమా అనే సందేహం చాలామందిలో ఉంటుంది. ఈ క్రమంలో నిపుణులు స్పష్టతనిస్తూ, వీటిలోని అద్భుతమైన పోషక విలువల గురించి పలు ఆసక్తికర విషయాలను వెల్లడించారు. చాలామంది అనుకునే విధంగా పుట్టగొడుగులు జంతువుల నుండి రావు. అలాగని ఇవి సాధారణ మొక్కలు కూడా కావు. ఇవి శిలీంధ్రాలు అనే ప్రత్యేక విభాగానికి చెందినవి. సాధారణ చెట్లలా వీటికి వేర్లు, ఆకులు, పువ్వులు ఉండవు, అలాగే ఇవి సూర్యరశ్మి ద్వారా కిరణజన్య సంయోగక్రియ జరపవు. చుట్టూ ఉండే సేంద్రియ పదార్థాల నుంచి పోషకాలను గ్రహించి పెరుగుతాయి. వీటిలో జంతు సంబంధిత కణాలు, గుడ్లు లేదా పాల పదార్థాలు ఏవీ ఉండవు కాబట్టి శాకాహారులు, వీగన్లు వీటిని నిస్సందేహంగా ఆహారంలో భాగం చేసుకోవచ్చు. మాంసానికి మంచి ప్రత్యామ్నాయ కూరగాయగా దీనిని భావిస్తారు.
అద్భుతమైన పోషకాల గని
పుట్టగొడుగుల్లో కేలరీలు, కొవ్వు శాతం చాలా తక్కువగా ఉంటాయి. బరువు తగ్గాలనుకునే వారికి ఇవి అద్భుతమైన ఎంపిక. వీటిలో శరీరానికి మేలు చేసే ప్రొటీన్లు, అవసరమైన అమైనో ఆమ్లాలు పుష్కలంగా ఉంటాయి. విటమిన్-బి, పొటాషియం, సెలీనియం వంటి ముఖ్య పోషకాలు లభిస్తాయి. ఇవి రోగనిరోధక శక్తిని పెంచి, నరాల పనితీరును మెరుగుపరుస్తాయి. వీటిలో ఉండే అధిక ఫైబర్ జీర్ణవ్యవస్థను ఆరోగ్యంగా ఉంచుతుంది. ఎక్కువ సమయం కడుపు నిండిన అనుభూతిని కలిగించి అనవసరమైన ఆకలిని నియంత్రిస్తుంది.
గుండె ఆరోగ్యానికి తోడ్పాటు
2025లో జరిగిన ఒక అధ్యయనం ప్రకారం.. క్రమం తప్పకుండా పుట్టగొడుగులను ఆహారంలో తీసుకోవడం వల్ల గుండె, జీర్ణ సంబంధిత సమస్యల ముప్పు తగ్గే అవకాశం ఉంది. వీటిలోని యాంటీఆక్సిడెంట్లు శరీర కణాలను ఫ్రీ రాడికల్స్ నష్టం నుంచి కాపాడుతాయి. అయితే కేవలం పుట్టగొడుగులు తిన్నంత మాత్రాన గుండె జబ్బులు రావని భావించకూడదని, జీవనశైలితో పాటు సమతులాహారంలో భాగంగా పప్పులు, గింజలు, ఇతర కూరగాయలతో కలిపి వీటిని తీసుకోవడం ఉత్తమమని నిపుణులు సూచిస్తున్నారు.