హైదరాబాద్‌: విద్యుత్ శాఖలో లంచం తీసుకుంటూ ఓ అసిస్టెంట్‌ ఇంజినీర్‌ (ఏఈ) అవినీతి నిరోధక శాఖ (ACB) అధికారులకు పట్టుబడ్డారు. ఆరు కొత్త విద్యుత్ మీటర్ల మంజూరు కోసం రూ.1.20 లక్షలు లంచం డిమాండ్‌ చేసి, ఆ మొత్తాన్ని స్వీకరిస్తుండగా అధికారులు రెడ్‌హ్యాండెడ్‌గా పట్టుకున్నారు. హైదరాబాద్‌ పాతబస్తీలో చోటుచేసుకున్న ఈ ఘటన స్థానికంగా చర్చనీయాంశంగా మారింది.
వివరాల్లోకి వెళ్తే.. తెలంగాణ సదరన్‌ పవర్‌ డిస్ట్రిబ్యూషన్‌ కంపెనీ లిమిటెడ్‌ (TGSPDCL) పరిధిలోని సంతోష్‌నగర్‌ సబ్‌స్టేషన్‌ పరిధిలో మాదన్నపేట సెక్షన్‌లో రాకేష్‌ అసిస్టెంట్‌ ఇంజినీర్‌గా విధులు నిర్వహిస్తున్నారు. ఆరు కొత్త విద్యుత్ మీటర్ల మంజూరు కోసం ఆయన లంచం డిమాండ్‌ చేసినట్లు ఏసీబీ అధికారులకు ఫిర్యాదు అందింది. ఈ ఫిర్యాదు ఆధారంగా రంగంలోకి దిగిన ఏసీబీ అధికారులు పక్కా ప్రణాళికతో ట్రాప్‌ నిర్వహించారు. ఇందులో భాగంగా రూ.1,20,000 లంచం తీసుకుంటున్న సమయంలో ఏఈ రాకేష్‌ను అధికారులు పట్టుకున్నారు. అనంతరం సంబంధిత ప్రక్రియలో భాగంగా తదుపరి చర్యలు చేపట్టారు.
ప్రభుత్వ కార్యాలయాల్లో లంచం డిమాండ్‌ చేస్తే తమకు సమాచారం అందించాలని ఏసీబీ అధికారులు ప్రజలకు సూచిస్తున్నారు. అవినీతికి పాల్పడే ప్రభుత్వ ఉద్యోగులపై చట్టప్రకారం చర్యలు తీసుకుంటామని స్పష్టం చేస్తున్నారు. ఈ ఘటనకు సంబంధించి ఏసీబీ అధికారులు మరింత లోతుగా దర్యాప్తు చేపట్టారు.
మరిన్ని క్రైమ్ వార్తల కోసం ఇక్కడ క్లిక్ చేయండి..