Asian Para Games: జపాన్‌లో జరుగుతున్న 2026 పారా ఆసియా క్రీడల్లో భారత అథ్లెట్లు అద్భుత ప్రదర్శన చేస్తున్నారు. మూడో రోజు కూడా పతకాల వేట కొనసాగిస్తూ భారత్ తన ఖాతాలో 47 పతకాలు వేసుకుంది. ఇందులో 12 స్వర్ణాలు, 17 రజతాలు, 18 కాంస్యాలు ఉన్నాయి. దీంతో పతకాల పట్టికలో ఐదో స్థానానికి చేరుకుంది. ముఖ్యంగా అథ్లెటిక్స్ విభాగంలో భారత క్రీడాకారులు వరుస విజయాలతో ఆకట్టుకుంటున్నారు. ఒకే ఈవెంట్‌లో మూడు పతకాలు సాధించడం, హైజంప్‌లో గేమ్స్ రికార్డు నెలకొల్పడం ప్రత్యేకతగా నిలిచాయి.
2.05 మీటర్ల జంప్‌తో ప్రవీణ్ కుమార్‌కు స్వర్ణం
పురుషుల హైజంప్ T64 విభాగంలో భారత అథ్లెట్ ప్రవీణ్ కుమార్ 2.05 మీటర్ల ఎత్తు దూకి గోల్డ్ మెడల్ సాధించాడు. ఈ ప్రదర్శనతో పారా ఆసియా క్రీడల రికార్డును కూడా తిరగరాశాడు. ఇదే విభాగంలో భారత్‌కు చెందిన బంటి 1.92 మీటర్లు దూకి సిల్వర్ మెడల్ గెలుచుకున్నాడు. దీంతో ఒకే ఈవెంట్‌లో భారత్‌కు స్వర్ణం, రజతం రెండూ దక్కాయి. మరోవైపు పురుషుల షాట్‌పుట్ F46 విభాగంలో సచిన్ ఖిలారీ 15.87 మీటర్ల దూరం గుండు విసిరి స్వర్ణం సాధించాడు. మహ్మద్ యాసిర్ 15.06 మీటర్లతో రజతం, ప్రవీణ్ 14.94 మీటర్లతో కాంస్యం గెలుచుకున్నారు. ఈ విభాగంలోని మూడు పతకాలూ భారత అథ్లెట్లకే దక్కడం విశేషం.
ఆయుష్ వర్మకు స్వర్ణం
పురుషుల షాట్‌పుట్ F53 ఫైనల్లో ఆయుష్ వర్మ 8.16 మీటర్ల దూరం గుండు విసిరి బంగారు పతకం అందుకున్నాడు. ఇదే పోటీల్లో అతడికి ఇది రెండో పతకం. అంతకుముందు జావెలిన్ త్రో F53/54 విభాగంలో కాంస్యం సాధించాడు. మహిళల షాట్‌పుట్ F34 విభాగంలో భారత అథ్లెట్ భాగ్యశ్రీ జాదవ్ 8.19 మీటర్ల దూరం గుండు విసిరి రజతం గెలుచుకుంది. పురుషుల 100 మీటర్ల T35 పరుగులో అనుభవ్ చౌదరి 12.72 సెకన్లలో లక్ష్యాన్ని చేరి కాంస్య పతకం సాధించాడు. ఈ ప్రదర్శన అతడి వ్యక్తిగత అత్యుత్తమ సమయంగా కూడా నిలిచింది.
ఆర్చరీలో శీతల్ దేవి, పాయల్ నాగ్‌కు రజతం
మహిళల కాంపౌండ్ డబుల్స్ ఆర్చరీ ఫైనల్లో భారత జోడీ శీతల్ దేవి, పాయల్ నాగ్ 141-150 స్కోరుతో చైనాకు చెందిన ఝావో జింగ్, జు ష్యూకింగ్ జోడీ చేతిలో ఓడిపోయింది. దీంతో భారత్‌కు రజత పతకం దక్కింది. ఈ పోటీల్లో శీతల్ దేవి ఇప్పటికే అద్భుత ప్రదర్శనతో ఆకట్టుకుంది. మహిళల కాంపౌండ్ ఆర్చరీ క్వాలిఫికేషన్ రౌండ్‌లో 720 పాయింట్లకు 704 సాధించి ప్రపంచ రికార్డును సమం చేసింది. భారత అథ్లెట్ల ఈ విజయాలు పారా క్రీడల్లో దేశం బలాన్ని మరోసారి చాటుతున్నాయి. రాబోయే రోజుల్లోనూ మరిన్ని పతకాలు సాధించాలని అభిమానులు ఆశిస్తున్నారు.
మరిన్ని క్రీడా వార్తల కోసం ఇక్కడ క్లిక్ చేయండి..