ఇదేంట్రా బాబు.. కోడి పుంజుకు ఏకంగా మటన్ రేటొచ్చింది! రెండు తెలుగు రాష్ట్రాల్లోనూ దసరా పండగొచ్చిందంటే చాలు.. ఇప్పుడు మార్కెట్లో నాటు కోళ్ల ధరలు చూస్తే మతిపోవాల్సిందే. అచ్చం కిలో మటన్ ఎంత ఉందో.. కిలో నాటు కోడి రేటు కూడా అంతే. అయినా సరే, పండగ పూట నోటికి రుచి ముఖ్యం బాసూ అంటూ నాన్-వెజ్ ప్రియులు ఎగబడి మరీ కొనేస్తున్నారు. దసరా అనగానే గుర్తొచ్చేది అమ్మవారి పూజలు, ఆ తర్వాత వచ్చే నాన్-వెజ్ ఘుమఘుమలు! విజయదశమి రోజున పూజలు చేసి అమ్మవారికి కోళ్లు, మేకలను బలి ఇవ్వడం ఆనవాయితీ. అయితే మార్కెట్లో గొర్రె, మేక ధరలు ఏకంగా రూ.10,000 పైనే పలుకుతుండటంతో.. అందరూ నాటు కోళ్ల వైపు మొగ్గు చూపుతున్నారు. ఇదే ఇప్పుడు డిమాండ్‌ను విపరీతంగా పెంచేసింది.
శ్రీకాకుళం జిల్లాలోని బుడుమూరు, నారాయణవలస, కొల్లివలస, కొజ్జిరి, అంపరం, మందస, అంభుగాం, పూండి, పాలకొండ, సీతంపేట సంతల్లో గత పది రోజులుగా నాటు కోళ్ల అమ్మకాలు జోరుగా సాగుతున్నాయి. అయితే రేట్లే షాకిస్తున్నాయి! మార్కెట్లో కిలో మటన్ ధర వెయ్యి రూపాయలు ఉంటే… అచ్చం అదే రేటుకు కిలో నాటు కోడి కూడా అమ్ముడవుతోంది! కోడి సైజును బట్టి ఒక్కో నాటు కోడి లేదా పెట్ట ఏకంగా రూ.1,000 నుంచి రూ.2,000 వరకు పలుకుతోంది.
మార్కెట్లో బాయిలర్ కోళ్లు చవక ధరకే దొరుకుతున్నా… దసరా పండగ పూట అమ్మవారికి మొక్కలు చెల్లించడానికి, ఇంట్లో రుచిగా వండుకోవడానికి నాటు కోడికే ఎక్కువ డిమాండ్ ఉంది. బాయిలర్ రుచి వేరు, నాటు కోడి పులుసు రుచే వేరు కదా! అందుకే రేటు ఎంత ఉన్నా సరే, నాన్-వెజ్ ప్రియులు మాత్రం వెనక్కి తగ్గడం లేదు. కొనుగోలు చేయడానికి ఎగబడుతున్నారు.
మరోవైపు నాటు కోళ్ల డిమాండ్‌ను చూసి కొందరు వ్యాపారులు క్యాష్ చేసుకుంటున్నారు. నాటు కోళ్లని చెప్పి తక్కువ ధర ఉండే గిరిరాజా కోళ్లను అంటగట్టేస్తున్నారు! చూడటానికి రెండు ఒకేలా ఉన్నా… గిరిరాజా కోడి కిలో రూ.500 మాత్రమే.. కానీ నాటు కోడి రేటు మాత్రం రూ.1,000 పైనే
ఇటు మటన్ ధరలు సైతం కొండెక్కాయి. హైదరాబాద్, విజయవాడ సహా.. చాలా ప్రాంతాల్లో కిలో మటన్ రూ.1,200కి చేరగా.. మేకపోతు మాంసం ఏకంగా రూ.1,400 వరకు పలుకుతోంది. పండుగ పూట పెరిగిన ఈ ధరలతో సామాన్యుల జేబులకు భారీగా చిల్లు పడుతోంది.
ఇక బ్రాయిలర్ చికెన్ అయితే.. కేజీ 300 నుంచి 350 వరకు విక్రయిస్తున్నారు.
మొత్తానికి.. మటన్‌తో పోటీ పడుతున్న నాటు కోడి ధరలు జేబుకు చిల్లు పడుతున్నా సరే.. పండగ ఆనందం ముందు ఆ మాత్రం ఖర్చు లెక్కలేదంటున్నారు నాన్-వెజ్ ప్రియులు. ఏదేమైనా, అమ్మవారికి ఇష్టమైన నైవేద్యమైనా, ఇంటికి వచ్చే అతిథుల కోసం వండే విందైనా.. నాటు కోడి ఉంటేనే ఆ పండగ కళ వస్తుందంటున్నారు.