తెలంగాణలో ముఖ్యమంత్రి రేవంత్ రెడ్డి అధ్యక్షతన జరిగిన రాష్ట్ర మంత్రివర్గ సమావేశం పలు కీలక నిర్ణయాలకు వేదికైంది. సంక్షేమం, అభివృద్ధి, పరిపాలనా సంస్కరణలు, న్యాయ వ్యవస్థ బలోపేతం వంటి అంశాలపై కేబినెట్ సుదీర్ఘంగా చర్చించి పలు ప్రతిపాదనలకు ఆమోదం తెలిపింది. ముఖ్యంగా రాష్ట్రంలోని ప్రతి కుటుంబానికి రూ.5 లక్షల జీవిత బీమా కల్పించే ఇందిరమ్మ కుటుంబ జీవిత బీమా పథకం ప్రారంభం, ఇందిరమ్మ చీరల పంపిణీ, ఎస్సీ, ఎస్టీలకు వేర్వేరు కమిషన్ల ఏర్పాటు వంటి నిర్ణయాలు ప్రాధాన్యత సంతరించుకున్నాయి.
ప్రతి కుటుంబానికి రూ.5 లక్షల జీవిత బీమా
మాజీ ప్రధాని ఇందిరాగాంధీ జయంతి సందర్భంగా నవంబర్ 19న సిద్దిపేటలో భారీ బహిరంగ సభ నిర్వహించాలని ప్రభుత్వం నిర్ణయించింది. అదే రోజు ఇందిరమ్మ చీరల పంపిణీ కార్యక్రమాన్ని ప్రారంభించనున్నారు. అలాగే రాష్ట్రంలోని ప్రతి కుటుంబానికి రూ.5 లక్షల జీవిత బీమా కల్పించే ఇందిరమ్మ కుటుంబ జీవిత బీమా పథకాన్ని కూడా ప్రారంభించనున్నారు. ఈ పథకం అమలులో భాగంగా నవంబర్ 20 నుంచి 30 వరకు రాష్ట్రంలోని ప్రతి గ్రామంలో ఇందిరమ్మ కమిటీలు ఇంటింటికీ వెళ్లి కుటుంబాల నుంచి దరఖాస్తులు సేకరిస్తాయి. సేకరించిన దరఖాస్తులను తహశీల్దార్లు, గ్రామ పంచాయతీ కార్యదర్శులు స్వీకరించనున్నారు. రాష్ట్రంలోని ప్రతి కుటుంబానికి రూ.5 లక్షల జీవిత బీమా వర్తించేలా ప్రభుత్వం ప్రణాళిక రూపొందించింది.
ఇందిరమ్మ ఇళ్లలో దీపావళి వేడుకలు
దీపావళి సందర్భంగా ‘మా ఇందిరమ్మ ఇంట్లో దీపావళి’ కార్యక్రమాన్ని రాష్ట్రవ్యాప్తంగా ఘనంగా నిర్వహించాలని కేబినెట్ నిర్ణయించింది. మంత్రులు, ఎమ్మెల్యేలు తమ నియోజకవర్గాల్లో ఇందిరమ్మ ఇళ్ల లబ్ధిదారులతో కలిసి వేడుకల్లో పాల్గొంటారు. రాష్ట్రవ్యాప్తంగా ఇప్పటికే 2,25,000 ఇందిరమ్మ ఇళ్ల నిర్మాణం పూర్తయినట్లు ప్రభుత్వం వెల్లడించింది. నిర్మాణం పూర్తయిన అన్ని ఇళ్లలో ఈ కార్యక్రమాన్ని నిర్వహించనున్నారు.
ఎస్సీ, ఎస్టీలకు వేర్వేరు కమిషన్లు
రాష్ట్రంలో ప్రస్తుతం కొనసాగుతున్న ఉమ్మడి ఎస్సీ, ఎస్టీ కమిషన్‌ను రద్దు చేసి, రెండు వేర్వేరు కమిషన్లు ఏర్పాటు చేయాలని మంత్రివర్గం నిర్ణయించింది. ఇందుకోసం తెలంగాణ స్టేట్ కమిషన్ ఫర్ షెడ్యూల్డ్ కాస్ట్స్ అండ్ షెడ్యూల్డ్ ట్రైబ్స్ యాక్ట్, 2003ను రద్దు చేసేందుకు ఆమోదం తెలిపింది. కొత్తగా ఏర్పాటు చేసే ప్రతి కమిషన్‌లో ఒక చైర్మన్‌తో పాటు ఐదుగురు సభ్యులు ఉంటారు. ఎస్సీ, ఎస్టీ వర్గాల నుంచి వచ్చే ఫిర్యాదులను వేగంగా పరిష్కరించేందుకు ఈ నిర్ణయం తీసుకున్నట్లు ప్రభుత్వం తెలిపింది.
ఫైర్ సర్వీస్ చట్టంలో సవరణలు
తెలంగాణ ఫైర్ సర్వీస్ యాక్ట్, 1999కు సవరణలు చేసే ఆర్డినెన్స్ జారీకి కేబినెట్ ఆమోదం తెలిపింది. అగ్ని ప్రమాదాల నివారణ, ప్రమాదాలకు కారణాల గుర్తింపు, అత్యవసర సమయాల్లో వేగంగా స్పందించడం వంటి అంశాలకు ఇందులో ప్రాధాన్యత ఇవ్వనున్నారు. ఇళ్లు, అపార్ట్‌మెంట్లు, షాపింగ్ కాంప్లెక్స్‌ల యజమానులు పాటించాల్సిన భద్రతా చర్యలతో పాటు అగ్నిమాపక శాఖ బాధ్యతలను కూడా స్పష్టంగా పొందుపరచనున్నారు.
భూ సర్వే అప్పీల్ గడువు తగ్గింపు
తెలంగాణ సర్వే అండ్ బౌండరీస్ యాక్ట్, 1923లోని సెక్షన్ 12(ఏ) సవరణ ప్రతిపాదనకు కేబినెట్ ఆమోదం తెలిపింది. సర్వే, సరిహద్దులకు సంబంధించి జారీ చేసే నోటీసులపై అప్పీల్ చేసుకునే గడువును ప్రస్తుతం ఉన్న 60 రోజుల నుంచి 30 రోజులకు తగ్గించాలని నిర్ణయించింది.
న్యాయస్థానాలకు 136 కొత్త పోస్టులు
రాష్ట్రంలో న్యాయ వ్యవస్థను మరింత బలోపేతం చేసేందుకు కేబినెట్ కీలక నిర్ణయం తీసుకుంది. జయశంకర్ భూపాలపల్లి జిల్లా కాటారం, హనుమకొండ జిల్లా ఎల్కతుర్తిలో కొత్తగా ఏర్పాటైన కోర్టులకు 56 పోస్టుల మంజూరుకు ఆమోదం తెలిపింది. అలాగే సిద్దిపేట, యాదాద్రి భువనగిరి జిల్లా చౌటుప్పల్, మహబూబాబాద్, రాజన్న సిరిసిల్ల జిల్లా వేములవాడలోని నాలుగు అదనపు జూనియర్ సివిల్ జడ్జి కోర్టులకు మరో 80 పోస్టులు మంజూరు చేయనున్నారు. దీంతో మొత్తం 136 పోస్టుల భర్తీకి మార్గం సుగమమైంది.
కొడంగల్‌లో సీఎం పర్యటన.. రైతు సభ
నవంబర్ 7 నుంచి 9 వరకు ముఖ్యమంత్రి రేవంత్ రెడ్డి కొడంగల్ నియోజకవర్గంలో పలు అభివృద్ధి కార్యక్రమాల్లో పాల్గొననున్నారు. నవంబర్ 9న కొడంగల్‌లో భారీ రైతు బహిరంగ సభ నిర్వహించనున్నారు. ఈ సభకు ముఖ్యమంత్రితో పాటు మంత్రులు, వ్యవసాయ శాస్త్రవేత్తలు హాజరుకానున్నారు.
డిసెంబర్‌లో తెలంగాణ గ్లోబల్ సమ్మిట్
రాష్ట్రానికి అంతర్జాతీయ స్థాయిలో పెట్టుబడులను ఆకర్షించే లక్ష్యంతో డిసెంబర్ 7, 8, 9 తేదీల్లో మూడు రోజుల పాటు తెలంగాణ గ్లోబల్ సమ్మిట్ నిర్వహించాలని ప్రభుత్వం నిర్ణయించింది. ఈ సదస్సు నిర్వహణ, పెట్టుబడుల ఆకర్షణ, పారిశ్రామిక అభివృద్ధి వంటి అంశాలపై కేబినెట్‌లో సుదీర్ఘంగా చర్చించారు.
ఏడు ప్రాంతాల్లో ప్రభుత్వ భూముల కేటాయింపు
రెవెన్యూ శాఖకు సంబంధించిన ఏడు ప్రాంతాల్లో ఉన్న ప్రభుత్వ భూములను వివిధ ప్రభుత్వ శాఖలకు కేటాయించాలని కేబినెట్ నిర్ణయం తీసుకుంది. ఆయా శాఖల అవసరాలు, అభివృద్ధి కార్యక్రమాలకు అనుగుణంగా భూముల కేటాయింపు చేపట్టనున్నారు.
మొత్తంగా చూస్తే.. ఇందిరమ్మ బీమా, చీరల పంపిణీ, ఇందిరమ్మ ఇళ్లలో దీపావళి వేడుకలు, ఎస్సీ, ఎస్టీలకు ప్రత్యేక కమిషన్లు, అగ్నిమాపక భద్రతా చట్ట సవరణలు, న్యాయస్థానాలకు కొత్త పోస్టులు.. ఇలా సంక్షేమం నుంచి పరిపాలన వరకు పలు కీలక నిర్ణయాలతో తెలంగాణ కేబినెట్ సమావేశం ప్రాధాన్యత సంతరించుకుంది.
Watch: ఇంత సడెన్ ఎంట్రీ ఇస్తే ఎట్లాగమ్మా.. కూతురిని చూసి కన్నీళ్లు ఆపుకోలేకపోయిన తల్లి!
మరిన్ని తెలంగాణ వార్తల కోసం ఇక్కడ క్లిక్ చేయండి..