మధుమేహం బారిన పడకుండా ఉండాలంటే మన ఆహారపు అలవాట్లలో మార్పులు చేసుకోవడం చాలా ముఖ్యం. ఢిల్లీకి చెందిన ప్రముఖ కార్డియాలజిస్ట్ ప్రకారం, రక్తంలో చక్కెర స్థాయిలను అదుపులో ఉంచడానికి కొన్ని ఆహార పదార్థాలకు పూర్తిగా దూరంగా ఉండాలి. వీటిని నివారించడం ద్వారా డయాబెటిస్ ముప్పును చాలా వరకు తగ్గించుకోవచ్చని నిపుణులు సూచిస్తున్నారు.
మైదా, రిఫైన్డ్ కార్బోహైడ్రేట్లు
మైదాతో తయారు చేసిన వైట్ బ్రెడ్, బిస్కెట్లు, పాస్తా, వివిధ రకాల బేకరీ ఐటమ్స్ ఆరోగ్యానికి అస్సలు మంచిది కాదు. రిఫైనింగ్ ప్రక్రియలో వీటిలోని పీచు పదార్థం పూర్తిగా తొలగిపోతుంది. ఫలితంగా ఇవి తిన్న వెంటనే శరీరంలో రక్తంలో చక్కెర స్థాయిలు ఒక్కసారిగా అమాంతం పెరుగుతాయి. కాబట్టి, వీటికి బదులుగా తృణధాన్యాలు తీసుకోవడం ఉత్తమం.
చక్కెర నిండిన పానీయాలు, సోడాలు
కూల్ డ్రింక్స్, సోడాలు, ఎనర్జీ డ్రింక్స్, ప్యాకేటెడ్ జ్యూస్‌లలో కృత్రిమ చక్కెరలు అత్యధిక మోతాదులో ఉంటాయి. ఇవి శరీరంలో ఇన్సులిన్ నిరోధకతను పెంచి డయాబెటిస్ బారిన పడేలా చేస్తాయి. దాహంగా ఉన్నప్పుడు సోడాలకు బదులుగా మంచి నీరు, మజ్జిగ లేదా కొబ్బరి నీళ్లు త్రాగడం ఆరోగ్యానికి ఎంతో మేలు చేస్తుంది.
ఇవి కూడా చదవండి
ప్రాసెస్ చేసిన, ప్యాకేటెడ్ స్నాక్స్
చిప్స్, నమ్‌కీన్లు, ఇతర ప్యాకేటెడ్ జంక్ ఫుడ్‌లలో హానికరమైన ట్రాన్స్ ఫ్యాట్స్, సోడియం, ప్రిజర్వేటివ్స్ నిండి ఉంటాయి. ఇవి గుండె జబ్బులతో పాటు టైప్-2 డయాబెటిస్ ప్రమాదాన్ని రెట్టింపు చేస్తాయి. ఇంట్లో తయారు చేసిన తాజా స్నాక్స్‌ను మాత్రమే తీసుకోవడానికి ప్రాధాన్యత ఇవ్వాలి.
ప్రాసెస్ చేసిన మాంసం
సాసేజ్‌లు, సలామీ, ఇతర ప్రాసెస్ చేసిన మాంస పదార్థాలలో అనారోగ్యకరమైన కొవ్వులు, రసాయనాలు ఉంటాయి. ఇవి జీర్ణవ్యవస్థను దెబ్బతీయడంతో పాటు శరీరంలో మంటను పెంచి మధుమేహం వచ్చేలా చేస్తాయి.
మధుమేహం బారిన పడకుండా ఆరోగ్యంగా జీవించాలంటే సమతుల్య ఆహారం తీసుకోవడం చాలా ముఖ్యం. ప్రాసెస్ చేసిన, చక్కెర అధికంగా ఉండే ఆహారాలకు దూరంగా ఉంటూ, పండ్లు, ఆకుకూరలు, కూరగాయలు, తృణధాన్యాలను రోజూ వారి ఆహారంలో చేర్చుకోవడం ద్వారా ఆరోగ్యకరమైన జీవితాన్నిసొంతం చేసుకోవచ్చు.
మరిన్ని లైఫ్ స్టైల్ న్యూస్ కోసం క్లిక్ చేయండి..